លោកអគ្គលេខាធិការអង្គការសហប្រជាជាតិតែងតាំងលោកស្រី វ្ល៉ាដាន់កា អាន់ឌ្រេវ៉ា ពីប្រទេសម៉ាសេដូនខាងជើងជាអ្នកសម្របសម្រួលអង្គការសហប្រជាជាតិប្រចាំនៅកម្ពុជា

លោកអគ្គលេខាធិការអង្គការសហប្រជាជាតិតែងតាំងលោកស្រី វ្ល៉ាដាន់កា អាន់ឌ្រេវ៉ា ពីប្រទេសម៉ាសេដូនខាងជើងជាអ្នកសម្របសម្រួលអង្គការសហប្រជាជាតិប្រចាំនៅកម្ពុជាបន្ទាប់ពីមានការយល់ព្រមពីរដ្ឋាភិបាលកម្ពុជា។ លោកស្រីបានចូលកាន់តំណែងនៅថ្ងៃទី ១០ ខែមករា ឆ្នាំ២០២៦។

លោកស្រី វ្ល៉ាដាន់កា នាំមកនូវបទពិសោធន៍ជាង ២៥ឆ្នាំក្នុងការអភិវឌ្ឍអន្តរជាតិ ការសម្របសម្រួលមនុស្សធម៌ យុទ្ធសាស្ត្រតស៊ូមតិ និងការកសាងភាពជាដៃគូនៅទូទាំងតំបន់នានា និងក្នុងបរិបទចម្រុះ។ ថ្មីៗនេះ លោកស្រីបានបម្រើការជាអ្នកសម្របសម្រួលអង្គការសហប្រជាជាតិប្រចាំប្រទេស Azerbaijan ដែលគាត់បានដឹកនាំក្រុមការងារអង្គការសហប្រជាជាតិក្នុងការជំរុញអាទិភាពនៃការអភិវឌ្ឍប្រកបដោយចីរភាព រួមមានក្នុងបរិបទនៃការស្តារឡើងវិញក្រោយជម្លោះ។

ក្នុងអំឡុងពេលបំពេញការងារនៅ Azerbaijan លោកស្រី វ្ល៉ាដាន់កា បានផ្តល់ភាពជាអ្នកដឹកនាំជាយុទ្ធសាស្ត្រ ដើម្បីគាំទ្រដល់ការចូលរួមជាប្រព័ន្ធរបស់អង្គការសហប្រជាជាតិក្នុងការរៀបចំសម្រាប់សន្និសីទអង្គការសហប្រជាជាតិស្តីពីការប្រែប្រួលអាកាសធាតុលើកទី២៩ (COP29) ដែលចូលរួមលើកកម្ពស់របៀបវារៈអាកាសធាតុផ្តោតលើបរិយាបន្ន និងការអភិវឌ្ឍ។ គាត់ក៏បានជំរុញការងារលើនគរូបនីយកម្មប្រកបដោយចីរភាព ការពង្រឹងភាពជាដៃគូ និងការគាំទ្រការពិគ្រោះថ្នាក់ជាតិក្នុងការឈានទៅ «វេទិការទីក្រុងពិភពលោកលើកទី១៣»។

លោកស្រី វ្ល៉ាដាន់កា បានកាន់តួនាទីជាន់ខ្ពស់នានា ជាមួយអង្គការយូអិនអេដស៍ (UNAIDS) រួមមានជាអ្នកតំណាងប្រចាំនៅកម្ពុជា ដែលលោកស្រីបានផ្តល់ភាពជាអ្នកដឹកនាំសម្រាប់ការឆ្លើយតបនឹងជំងឺកូវីដ-១៩ នៃប្រព័ន្ធយូអិន កិច្ចខិតខំប្រឹងប្រែងឆ្លើយតប និងធ្វើការងារជាទីប្រឹក្សាអន្តរាគមន៍យុទ្ធសាស្ត្រនៅការិយាល័យ UNAIDS ប្រចាំតំបន់សម្រាប់អាស៊ី និងប៉ាស៊ីហ្វិក និងជាប្រធានក្រុមតាមដាន និងវាយតម្លៃសម្រាប់ UNAIDS នៅវៀតណាម។

លោកស្រី វ្ល៉ាដាន់កា ក៏ធ្លាប់បម្រើការជាមួយយូអិនឌីភី (UNDP) ជាទីប្រឹក្សាគោលនយោបាយសម្រាប់ទ្វីបអឺរ៉ុប និង Commonwealth of Independent States (CIS) បន្ទាប់ពីធ្វើការជាទីប្រឹក្សាអ្នកសម្របសម្រួលអង្គការសហប្រជាជាតិប្រចាំនៅម៉ាសេដូនខាងជើង។ លោកស្រីបានគាំទ្រជំនួយមនុស្សធម៌ជាមួយអង្គការសុខភាពពិភពលោក (WHO) និងការិយាល័យអង្គការសហប្រជាជាតិសម្រាប់សម្របសម្រួលកិច្ចការមនុស្សធម៌(OCHA)។
មុនពេលចូលរួមជាមួយអង្គការសហប្រជាជាតិ លោកស្រី វ្ល៉ាដាន់កា បានធ្វើការជាមួយអង្គការមិនរកប្រាក់ចំណេញ Pharmaciens Sans Frontières ដោយសម្របសម្រួលការផ្តល់ជំនួយមនុស្សធម៌សម្រាប់សហគមន៍ជនភៀសខ្លួន។

លោកស្រី វ្ល៉ាដាន់កា បានបញ្ចប់ថ្នាក់បរិញ្ញាបត្រផ្នែកវេជ្ជសាស្ត្រធ្មេញ និងបរិញ្ញាបត្រជាន់ខ្ពស់ផ្នែកសុខភាពសាធារណៈ។