អ្នកសម្របសម្រួលអង្គការសហប្រជាជាតិប្រគល់សារតាំងជូនរាជរដ្ធាភិបាលកម្ពុជា

ក្នុងជំនួបនេះ លោកស្រី អាន់ឌ្រេវ៉ា បានថ្លែងអំណរគុណដល់រាជរដ្ឋាភិបាលកម្ពុជាចំពោះកិច្ចសហប្រតិបត្តិការយូរអង្វែងជាមួយអង្គការសហប្រជាជាតិ។ លោកស្រីបានបង្ហាញនូវការប្តេជ្ញាចិត្តរបស់អង្គការសហប្រជាជាតិក្នុងការគាំទ្រអាទិភាពជាតិ និងជួយពន្លឿនគោលដៅអភិវឌ្ឍន៍ប្រកបដោយចីរភាពតាមរយៈការលើកកម្ពស់ភាពជាដៃគូអភិវឌ្ឍន៍។

តាមរយៈក្របខ័ណ្ឌកិច្ចសហប្រតិបតិ្តការអភិវឌ្ឍន៍ប្រកបដោយចីរភាពនៃអង្គការសហប្រជាជាតិសម្រាប់កម្ពុជា  (ឆ្នាំ២០២៤-២០២៨) លោកស្រី អាន់ឌ្រេវ៉ា បានលើកឡើងពីអាទិភាពយុទ្ធសាស្ត្រ ដែលរួមមានការអភិវឌ្ឍមូលធនមនុស្ស ការគាំពារសង្គមជាសកល ភាពធន់នឹងអាកាសធាតុ និងបរិវត្តកម្មឌីជីថល។ សសរស្តម្ភទាំងនេះត្រូវបានកំណត់ឡើងដើម្បីជំរុញការអភិវឌ្ឍប្រទេសកម្ពុជា និងជាផែនទីបង្ហាញផ្លូវគាំទ្រដល់កម្ពុជាសម្រាប់ការចាកចេញពីក្រុមប្រទេសដែលមានការអភិវឌ្ឍតិចតួច។ 

លោកស្រីបានលើកឡើងថា អង្គការសហប្រជាជាតិបានពង្រឹងតួនាទីជាដៃគូយុទ្ធសាស្ត្រ​សម្រាប់កម្ពុជា ដោយអនុលោមតាមការកែទម្រង់ជាសកលក្នុងការផ្តល់យោបល់ផ្នែកគោលនយោបាយកម្រិតខ្ពស់ និងនវានុវត្តន៍ដែលសមស្របតាមបរិបទជាក់លាក់ដើម្បីគាំទ្រដល់ចក្ចុវិស័យនិងមហិច្ឆតានៃការអភិវឌ្ឍរបស់ប្រទេសនីមួយៗ។

ដោយគូសបញ្ជាក់ពីតួនាទីរបស់អង្គការសហប្រជាជាតិ លោកស្រី អាន់ឌ្រេវ៉ា បានលើកឡើងថា៖

«ខ្ញុំពិតជាមានកិត្តិយស ក្នុងការដឹកនាំអង្គការសហប្រជាជាតិនៅកម្ពុជា ក្នុងកាលទេសៈដ៏សំខាន់នេះ។ ខណៈពេលដែលកម្ពុជារៀបចំចាកចេញពីក្រុមប្រទេសដែលមានការអភិវឌ្ឍតិចតួច ការប្តេជ្ញាចិត្តរបស់អង្គការសហប្រជាជាតិដោយផ្តោតលើអភិក្រម«អង្គការសហប្រជាជាតិតែមួយ» គឺពិតជាមានសារៈសំខាន់ជាងពេលណាៗទាំងអស់។ យើងផ្តោតសំខាន់ទៅលើការគាំទ្រយុទ្ធសាស្ត្របញ្ចកោណ ការវិនិយោគទៅលើមូលធនមនុស្ស ជំរុញបរិវត្តកម្មបៃតង និងឌីជីថល និងធានាថាសហគមន៍ងាយរងគ្រោះមិនត្រូវបានទុកចោល។ ខ្ញុំនឹងពង្រឹងភាពជាដៃគូជាមួយគ្រប់ភាគីពាក់ព័ន្ធរបស់អង្គការសហប្រជាជាតិដើម្បីកសាងអនាគតប្រកបដោយបរិយាបន្ន និងភាពធន់សម្រាប់ប្រជាពលរដ្ឋកម្ពុជាគ្រប់រូប»។

ទាក់ទងនឹងការដោះស្រាយបញ្ហាប្រឈមនាពេលបច្ចុប្បន្ន លោកស្រី អាន់ឌ្រេវ៉ា ក៏បានពិភាក្សាអំពីការគាំទ្រផ្នែកមនុស្សធម៌ និងការស្តារឡើងវិញរបស់អង្គការសហប្រជាជាតិដល់គ្រួសារដែលរងផលប៉ះពាល់ដោយសារជម្លោះព្រំដែននាពេលថ្មីៗនេះ។ លោកស្រីបានសង្កត់ធ្ងន់ថា សន្តិភាព និងស្ថេរភាពនៅតែជាមូលដ្ឋានគ្រឹះដែលមិនអាចខ្វះបានសម្រាប់ការអភិវឌ្ឍប្រកបដោយចីរភាព។

អង្គការសហប្រជាជាតិនៅតែជាដៃគូរបស់រាជរដ្ឋាភិបាល និងប្រជាជនកម្ពុជា ដោយបន្តធ្វើការរួមគ្នាដើម្បីកសាងនូវអនាគតប្រកបដោយបរិយាបន្ន ភាពធន់ និងចីរភាពសម្រាប់ទាំងអស់គ្នា។

អំពីលោកស្រី វ្ល៉ាដាន់កា អាន់ឌ្រេវ៉ា៖ 

លោកស្រី វ្ល៉ាដាន់កា អាន់ឌ្រេវ៉ា មានបទពិសោធន៍ជាអ្នកដឹកនាំជាង២៥ឆ្នាំក្នុងការអភិវឌ្ឍអន្តរជាតិ ការសម្របសម្រួលមនុស្សធម៌ និងការតស៊ូមតិជាយុទ្ធសាស្ត្រ។ ថ្មីៗនេះ លោកស្រីបានជាអ្នកសម្របសម្រួលអង្គការសហប្រជាជាតិប្រចាំប្រទេសអាស៊ែបៃហ្សង់ (Azerbaijan) ដែលលោកស្រីបានដឹកនាំក្រុមការងារអង្គការសហប្រជាជាតិក្នុងបរិបទនៃការស្តារឡើងវិញក្រោយជម្លោះ និងបានផ្តល់ចក្ខុវិស័យជាយុទ្ធសាស្រ្តសម្រាប់ការចូលរួមរបស់អង្គការសហប្រជាជាតិនៅក្នុងសន្និសីទអង្គការសហប្រជាជាតិស្តីពីការប្រែប្រួលអាកាសធាតុលើកទី២៩ (COP29) ដែលផ្តោតលើរបៀបវារៈការអភិវឌ្ឍប្រកបដោយបរិយាបន្ន និងគិតគូរពីអាកាសធាតុ។ 

លោកស្រី អាន់ឌ្រេវ៉ា មានបទពិសោធន៍នៅតំបន់អាស៊ី និងប៉ាស៊ីហ្វិក។ លោកស្រីធ្លាប់ជានាយិកាកម្មវិធីសហប្រជាជាតិរួមគ្នាស្តីពីមេរោគអេដស៍/ជំងឺអេដស៍ (UNAIDS) ប្រចាំនៅកម្ពុជា  និងធ្លាប់បំពេញតួនាទីជាន់ខ្ពស់ នៅការិយាល័យអង្គការ​  UNAIDS ប្រចាំតំបន់ អាស៊ីនិងប៉ាស៊ីហ្វិក និង នៅការិយាល័យ UNAIDS វៀតណាមផងដែរ។

លោកស្រីក៏មានបទពិសោធន៍ បម្រើការងារជាមួយកម្មវិធីអភិវឌ្ឍន៍សហប្រជាជាតិ (UNDP) ជាទីប្រឹក្សាគោលនយោបាយសម្រាប់ទ្វីបអឺរ៉ុប និង CIS ព្រមទាំងតួនាទីដឹកនាំនៅអង្គការសុខភាពពិភពលោក (WHO) ការិយាល័យអង្គការសហប្រជាជាតិសម្រាប់សម្របសម្រួលកិច្ចការមនុស្សធម៌ (OCHA) និងអង្គការគ្រូពេទ្យគ្មានព្រំដែន។