សាកលវិទ្យាល័យជាតិបាត់ដំបង (NUBB) ទទួលភារៈជាស្ថាប័នសម្របសម្រួល និងដឹកនាំថ្នាលស្រាវជ្រាវ នវានុវត្តន៍ និងបច្ចេកវិទ្យាអាហារ (FTRIP) ដើម្បីជំរុញ ការស្រាវជ្រាវ និងនវានុវត្តន៍ក្នុងវិស័យម្ហូបអាហារនៅកម្ពុជា
04 August 2025
បាត់ដំបង ថ្ងៃទី១៨ ខែកក្កដា ឆ្នាំ២០២៥៖ សាកលវិទ្យាល័យជាតិបាត់ដំបង (NUBB) បានទទួលភារៈថ្មីក្នុងការដឹកនាំ និងសម្របសម្រួលថ្នាលស្រាវជ្រាវ នវានុវត្តន៍ និងបច្ចេកវិទ្យាអាហារ (FTRIP) ដែលជាយន្តការពហុភាគី បំពេញភារកិច្ចប្រកប ដោយប្រសិទិ្ធភាពលើផ្នែកស្រាវជ្រាវ និងអភិវឌ្ឍន៍ (R&D) ព្រមទាំងនវានុវត្តន៍ក្នុងអនុវិស័យជលផលក្រោយប្រមូលផល និងក្នុងឧស្សាហកម្មកសិម្ហូបអាហារនៅកម្ពុជា។ ភារៈជាស្ថាប័នម្ចាស់ផ្ទះថ្មីនេះ គឺជាការបើកកាលានុវត្តភាពដ៏ស្រួចស្រាវមួយបន្ថែមទៀត ដើម្បីពង្រឹងសក្តានុពលរបស់ថ្នាល FTRIP ក្នុងការរួមចំណែកអភិវឌ្ឍឧស្សាហកម្មម្ហូបអាហារនៅកម្ពុជាប្រកបដោយនិរន្តរភាព។
បណ្ឌិត សេតធី ស៊ីថារ៉ាម៉ា ថមបាធូ ប្រធានទីប្រឹក្សាបច្ចេកទេស របស់អង្គការ UNIDO លើកឡើងថា «FTRIP ត្រូវបានបង្កើតក្រោមគំនិតផ្តួចផ្តើមរបស់គម្រោងអភិវឌ្ឍន៍ជលផលក្រោយប្រមូលផល (CAPFISH-Capture) ដែលគាំទ្រថវិកាដោយសហភាពអឺរ៉ុប (EU) និងអនុវត្តរួមគ្នាដោយ រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ និងអង្គការ UNIDO សម្រេចបានសមិទិ្ធផលជាដុំកំភួនជាច្រើនឆ្លើយតប និងចូលរួមដោះស្រាយបញ្ហាប្រឈមរបស់សហគ្រាសជលផលពាក់ព័ន្ធនឹងផលិតកម្ម គុណភាព និងសុវត្ថិភាពម្ហូបអាហារ។ យើងក៏សូមយកឱកាសនេះ ថ្លែងអំណរគុណដល់ វិទ្យាស្ថានបច្ចេកវិទ្យាកម្ពុជា (ITC) ដែលជាស្ថាប័នម្ចាស់ផ្ទះដឹកនាំថ្នាល FTRIP ប្រកបដោយភាពជោគជ័យនាពេលកន្លងមក ហើយក៏ជឿជាក់ថា NUBB ក៏នឹងបន្តដឹកនាំថ្នាលប្រកបដោយផ្លែផ្កាបន្ថែមទៀត។»
គម្រោងស្រាវជ្រាវអនុវត្តន៍ចំនួន ២៣ ត្រូវបានបញ្ចប់ដោយជោគជ័យ ក្រោមកិច្ចគាំទ្ររបស់ FTRIP ក្នុងតម្លៃទឹកប្រាក់ ជាង ៣៥០.០០០ ដុល្លារអាមេរិក ដែលជាប្រយោជន៍ដល់គ្រឹះស្ថានឧត្តមសិក្សាចំនួន ៥ ជាពិសេសអ្នកស្រាវជ្រាវ និងសាស្រ្តាចារ្យចំនួន ៦៨រូប និងនិស្សិតចំនួន ៨៦ នាក់។ បន្ថែមលើនេះ គម្រោងស្រាវជ្រាវចំនួន ៧ ផ្សេងទៀត បានទទួលកញ្ចប់ថវិកាបន្ថែមចំនួន ១៥០.០០០ ដុល្លារអាមេរិក ដើម្បីពង្រីកផលិតកម្មឈានចូលទៅកាន់ទីផ្សារ។ ម៉ូឌុលស្តីពីគុណភាពផលិតផល ការធ្វីពាណិជ្ជកម្ម និង HACCP ក៏ត្រូវបានបង្កើត និងដាក់បញ្ចូលទៅក្នុងកម្មវិធីសិក្សារបស់សាកលវិទ្យាល័យសមាជិកផងដែរ បន្ថែមពីលើការអនុម័តគោលការណ៍ណែនាំស្តីពី សន្ទស្សន៍នវានុវត្តន៍សហគ្រាសកម្ពុជា (CEII) ការចុះបញ្ជីប្រហុកសៀមរាបជាម៉ាកសម្គាល់ភូមិសាស្រ្តទំនិញ និងបានគាំទ្រដល់សាកលវិទ្យាល័យចំនួន ៤ ក្នុងការបង្កើតក្របខ័ណ្ឌកម្មសិទ្ធិបញ្ញា។ មជ្ឈមណ្ឌលអភិវឌ្ឍន៍ ការវេចខ្ចប់កម្ពុជា (CPC) បានបើកដំណើរការក្នុងខែធ្នូ ឆ្នាំ២០២៤ និងបានក្លាយជាសមាជិកពេញសិទ្ធិរបស់ អង្គការវេចខ្ចប់ពិភពលោក (WPO) នាពេលថ្មីៗនេះ ដែលជាឧត្តមប្រយោជន៍សម្រាប់សហគ្រាសក្នុងស្រុក ទទួលបានជំនួយបច្ចេកទេសពីថ្នាក់ជាតិ តំបន់ និងសកល។ ទាំងនេះជាសមិទ្ធិផលរបស់ថ្នាល FTRIP កន្លងមក។
អំឡុងពេលកិច្ចប្រជុំគណៈកម្មាធិការតម្រង់ទិសរបស់ថ្នាល FTRIP នាថ្ងៃទី១៧ ខែកក្កដា ឆ្នាំ២០២៥ NUBB បានទទួលភារៈជាស្ថាបន័ម្ចាស់ផ្ទះថ្មី បង្ហាញពីការប្តេជ្ញាចិត្តក្នុងការលើកកម្ពស់នវានុវត្តន៍ផ្អែកលើការស្រាវជ្រាវ និងពង្រីកកិច្ចសហការរវាងរដ្ឋ និងឯកជន។ ឯកឧត្តម សុខ ឃន សាកលវិទ្យាធិការ នៃសកលវិទ្យាល័យបាត់ដំបង បានសន្យាថានឹងយកចិត្តទុកដាក់ខ្ពស់ធ្វើយ៉ាងណាឱ្យថ្នាលដំណើការទៅបានដោយរលូន និងជោគជ័យដោយសង្កត់ធ្ងន់លើគំនិតផ្តួចផ្តើមថ្មីៗដើម្បីជាផលប្រយោជន៍ដល់វិស័យម្ហូបអាហារ អ្នកស្រាវជ្រាវ និងនិស្សិត និងការគៀងគរការគាំទ្រហិរញ្ញវត្ថុសម្រាប់គម្រោងស្រាវជ្រាវបន្ថែមទៀត។ NUBB ត្រូវបានបង្កើតឡើងក្នុងឆ្នាំ២០០៧ ដោយមានការទទួលស្គាល់ទាំងថ្នាក់ជាតិ និងអន្តរជាតិលើឧត្តមភាពផ្នែកសិក្សាធិការ ការស្រាវជ្រាវប្រកបដោយភាពច្នៃប្រឌិត និងការរួមចំណែកយ៉ាងសំខាន់ដល់ការអភិវឌ្ឍសេដ្ឋកិច្ចសង្គម ជាពិសេសនៅបណ្តាខេត្តភាគពាយព្យនៃព្រះរាជាណាចក្រកម្ពុជា។ ដូច្នេះ NUBB ជាសាកលវិទ្យាល័យដែលមានស្ថានភាពដ៏គាប់ប្រសើរ ក្នុងការជ្រោមជ្រែងកិច្ចខិតខំប្រឹងប្រែងបន្តសម្របសម្រួល FTRIP ក្នុងការពង្រឹងគម្រោងស្រាវជ្រាវអនុវត្តនៅតាមគ្រឹះស្ថានឧត្តមសិក្សានៅកម្ពុជា ថ្វីត្បិតតែផ្តើមចេញពីវិស័យជលផលនាពេលនេះក៏ដោយ តែវិសាលភាព និងផលជះនឹងត្រូវបានពង្រីកបន្ថែមឱ្យ បានកាន់តែទូលំទូលាយលើផលិតកម្មស្បៀងអាហារនាពេលដ៏ខ្លីខាងមុខ។
ក្នុងការបញ្ជាក់ និងលើកឡើងពីតួនាទីសំខាន់របស់ FTRIP ក្នុងផ្នែកនវានុវត្តន៍ ឯកឧត្តម បណ្ឌិត ហ៊ុល សៀងហេង អនុរដ្ឋលេខាធិការ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានសង្កត់ធ្ងន់ថា «ដើម្បីធានាបាននូវនិរន្តរភាពរបស់ FTRIP សមាជិកនឹងបន្តគាំទ្រលើឯករាជ្យភាពផ្នែកហិរញ្ញវត្ថុរបស់ថ្នាល ដែលមានភាពជាសារវ័ន្តដើម្បីដោះស្រាយបញ្ហាប្រឈមផ្នែកកសិម្ហូបអាហារ ធានាបានអនុលោមភាពសុវត្ថិភាពម្ហូបអាហារ និងការទទួលបានតម្លៃបន្ថែម ឈានទៅលើកកម្ពស់ភាពប្រកួតប្រជែងក្នុងទីផ្សារក្នុងស្រុក និងទីផ្សារនាំចេញ ជាពិសេសទីផ្សារអឺរ៉ុប។»
ស្រដៀងគ្នានេះផងដែរ បណ្ឌិត ខូវ គួង អនុប្រធាន រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា «FTRIP ដើរតួនាទីយ៉ាងសំខាន់ក្នុងការគាំទ្រការអភិវឌ្ឍគោលនយោបាយ និងលើកស្ទួយកិច្ចសហការផ្នែកឧស្សាហកម្មម្ហូបអាហារ ជាពិសេសផ្នែកជលផលក្រោយប្រមូលផល។ ខ្ញុំជឿជាក់ថា ក្រោមការដឹកនាំរបស់ NUBB ថ្នាលស្រាវជ្រាវនេះនឹងសម្រេចបានបច្ចេកវិទ្យាថ្មីៗ គាំទ្រ និងផ្តល់តម្លៃបន្ថែមដល់ផលិតផលជលផល និងកសិម្ហូបអាហារនៅកម្ពុជា។»
សម្រាប់ព័ត៌មានបន្ថែម សូមទំនាក់ទំនង៖
១. បណ្ឌិត ស្រ៊ាន ពៅ សាកលវិទ្យាធិការរង សាកលវិទ្យាល័យជាតិបាត់ដំបង៖ srean.pao@nubb.eddu.kh
២. លោក អឹម សំរួល ជំនាញការផ្នែកទំនាក់ទំនង និងផ្សព្វផ្សាយ៖ S.Im@unido.org
អង្គភាពរបស់អង្គការសហប្រជាជាតិដែលចូលរួមក្នុងគំនិតផ្តួចផ្តើមនេះ
គោលដៅប្រកបដោយចីរភាពដែលគាំទ្រតាមរយៈគំនិតផ្តួចផ្តើមនេះ
