ការិយាល័យអង្គការសហប្រជាជាតិសម្រាប់សេវាកម្មគម្រោង (UNOPS) និងក្រសួងចំនួនបីរបស់កម្ពុជា ធ្វើការងារក្រោម ភាពជាដៃគូ ដើម្បីជំរុញការអភិវឌ្ឍហេដ្ឋារចនាសម្ព័ន្ធ ប្រកបដោយចីរភាព
21 January 2025
រាជធានីភ្នំពេញ ថ្ងៃទី២០ ខែមករា ឆ្នាំ២០២៥ - ការិយាល័យអង្គការសហប្រជាជាតិសម្រាប់សេវាកម្មគម្រោង (UNOPS) បានចុះហត្ថលេខាលើអនុស្សារណៈនៃការយោគយល់គ្នា (MOU) ជាមួយក្រសួងសំខាន់ៗចំនួនបីរបស់រាជរដ្ឋាភិបាលកម្ពុជា ជាអាទិ៍ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ (MISTI) ក្រសួងសាធារណការ និងដឹកជញ្ជូន (MPWT) និងក្រសួងរៀបចំដែនដី នគរូបនីយកម្ម និងសំណង់ (MLMUPC)។ ភាពជាដៃគូទាំងនេះ ជួយជម្រុញបន្ថែមដល់ការសម្រេចបាននូវចក្ខុវិស័យរបស់កម្ពុជាលើហេដ្ឋារចនាសម្ព័ន្ធ និងការអភិវឌ្ឍប្រកបដោយចីរភាព និងបរិយាបន្ន ដោយសារប្រទេសកម្ពុជាកំពុងបោះជំហានក្លាយទៅជាប្រទេសមានចំណូលមធ្យម កម្រិតខ្ពស់នៅត្រឹមឆ្នាំ២០៣០ និងប្រទេសមានចំណូលខ្ពស់នៅត្រឹមឆ្នាំ២០៥០។
កិច្ចសហការជាយុទ្ធសាស្រ្តនេះគូសបញ្ជាក់នូវសមិទ្ធផលដែលគួរឱ្យកោតសរសើររបស់រាជរដ្ឋាភិបាលកម្ពុជាលើវិស័យហេដ្ឋារចនាសម្ព័ន្ធ នគរូបនីយកម្ម និងនវានុវត្តន៍ ហើយកិច្ចសហការនេះក៏មានគោលបំណងពង្រឹងបន្ថែមទៀតចំពោះកិច្ចខិតខំប្រឹងប្រែង របស់រាជរដ្ឋាភិបាលដើម្បីធានាអោយបាននូវផលប្រយោជន៍នៃការអភិវឌ្ឍទៅដល់សហគមន៍ទាំងអស់។
ការជំរុញចក្ខុវិស័យកម្ពុជាសម្រាប់ការអភិវឌ្ឍហេដ្ឋារចនាសម្ព័ន្ធប្រកបដោយចីរភាព
ក្នុងរយៈពេលប៉ុន្មានឆ្នាំចុងក្រោយនេះ ក្រោមការដឹកនាំរបស់រាជរដ្ឋាភិបាលកម្ពុជា ប្រទេសកម្ពុជាបានបង្ហាញនូវវឌ្ឍនភាព គួរឱ្យកត់សម្គាល់ ស្របទៅនឹងគោលដៅអភិវឌ្ឍន៍ប្រកបដោយចីរភាព (SDGs)។ លោកស្រី Eda Kraja ប្រធានគ្រប់គ្រងការិយាល័យអង្គការសហប្រជាជាតិសម្រាប់សេវាកម្មគម្រោង (UNOPS) ប្រចាំប្រទេសកម្ពុជា មានប្រសាសន៍ឱ្យដឹងថា “ដំណើរការអភិវឌ្ឍហេដ្ឋារចនាសម្ព័ន្ធរបស់កម្ពុជា គឺជាសក្ខីកម្មនៃការប្ដេជ្ញាចិត្តរបស់រដ្ឋាភិបាល ក្នុងការជំរុញការអភិវឌ្ឍប្រកបដោយចីរភាព។ តាមរយៈភាពជាដៃគូទាំងនេះ ការិយាល័យអង្គការសហប្រជាជាតិសម្រាប់ សេវាកម្មគម្រោង (UNOPS) មានមោទនភាពក្នុងការគាំទ្រចក្ខុវិស័យ និងការដឹកនាំរបស់ក្រសួងសាធារណការ និងដឹកជញ្ជូន ក្រសួងរៀបចំដែនដី នគរូបនីយកម្ម និងសំណង់ និងក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍នៅក្នុងការដឹកនាំការអភិវឌ្ឍភាពធន់នឹងបម្រែបម្រួលអាកាសធាតុ ប្រកបដោយចីរភាព។”
ការប្ដេជ្ញាចិត្តរួមនៅក្នុងចំណោមក្រសួងសំខាន់ៗ
ការចុះអនុស្សារណៈនៃការយោគយល់គ្នា ជាមួយក្រសួងទាំងបីនេះនឹងផ្ដល់អាទិភាពទៅលើការផ្ដល់ជំនួយបច្ចេកទេស និងការពង្រឹងសមត្ថភាពស្ថាប័ន ដែលជាការកំណត់នូវវេទិកាសម្រាប់កិច្ចខិតខំប្រឹងប្រែងរួមគ្នានាពេលអនាគត។
កិច្ចព្រមព្រៀងនេះគូសបញ្ជាក់អំពី កិច្ចសហការទៅលើអាទិភាពដូចខាងក្រោម៖
- ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ (MISTI)៖ ការជំរុញការអនុម័ត ប្រើប្រាស់បច្ចេកវិទ្យាបៃតង និងការដោះស្រាយភាពបន្ស៊ាំទៅនឹងការប្រែប្រួលអាកាសធាតុសម្រាប់ហេដ្ឋារចនាសម្ព័ន្ធ ទឹក និងអនាម័យ។
- ក្រសួងសាធារណការ និងដឹកជញ្ជូន (MPWT)៖ ការពង្រឹងប្រព័ន្ធហេដ្ឋារចនាសម្ព័ន្ធប្រកបដោយភាពធន់ និងចីរភាព ព្រមទាំងការលើកកម្ពស់បណ្ដាញដឹកជញ្ជូនប្រកបដោយប្រសិទ្ធភាព និងបរិយាបន្ន។
- ក្រសួងរៀបចំដែនដី នគរូបនីយកម្ម និងសំណង់ (MLMUPC)៖ ការជំរុញការអភិវឌ្ឍទីក្រុង/ ទីប្រជុំជនប្រកបដោយចីរភាព ការដោះសា្រយបញ្ហាប្រឈមផ្នែកបរិស្ថានដើម្បីផ្ដល់ប្រយោជន៍ដូចគ្នាទៅ ដល់សហគមន៍នានានៅទីជនបទ និងទីក្រុង/ទីប្រជុំជន។
ភាពជាដៃគូដើម្បីបង្កើតឱ្យមាននូវផលជះ
ឯកឧត្តម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ មានប្រសាសន៍ថា “ការទទួលបានសេវាទឹកស្អាតមិនត្រឹមតែជាសិទ្ធិមនុស្សជាមូលដ្ឋានប៉ុណ្ណោះទេ តែវាមានសារៈសំខាន់ចំពោះសុខភាពសាធារណៈ ការអភិវឌ្ឍសង្គម-សេដ្ឋកិច្ច និងនិរន្តរភាពបរិស្ថាន។ កិច្ចសហការនេះ គឺជាគំរូមួយដែលបង្ហាញថា ការវិនិយោគចំគោលដៅអាចជំរុញការផ្លាស់ប្ដូរជាដុំកំភួន ពិសេស សម្រាប់សហគមន៍ដែលងាយរងគ្រោះ។”
ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណៈការ និងដឹកជញ្ជូន បានគូសបញ្ជាក់អំពីសមិទ្ធផល និងគោលដៅនាពេលអនាគតរបស់កម្ពុជា៖ “តាមរយៈគំនិតផ្ដួចផ្ដើមប្រកបដោយចក្ខុវិស័យ ដូចជា CITLS ២០២៣-២០៣៣ និងភាពរីកចម្រើននៅក្នុងនគរូបនីយកម្ម ប្រទេសកម្ពុជាបានចាក់គ្រឹះរឹងមាំសម្រាប់វឌ្ឍនភាព។ ភាពជាដៃគូរបស់យើង ជាមួយអង្គការ UNOPS នឹងនាំមកនូវជំនាញបច្ចេកទេស និងការគាំទ្រលើការសាងសមត្ថភាព ដែលជំរុញគាំទ្រដល់ការវិនិយោគលើហេដ្ឋារចនាសម្ព័ន្ធ ដើម្បីផ្ដល់ផលប្រយោជន៍ប្រកបដោយអត្ថន័យ និងរយៈពេលវែងសម្រាប់ ពលរដ្ឋកម្ពុជាទាំងអស់។”
ឯកឧត្តម រស់ សាលីន រដ្ឋលេខាធិការនៃក្រសួងរៀបចំដែនដី នគរូបនីយកម្ម និងសំណង់ បានសង្កត់ធ្ងន់លើសារសំខាន់នៃភាពរីកចម្រើននៅតំបន់ទីក្រុង/ទីប្រជុំជនប្រកបដោយចីរភាព៖ “ជាពិសេស យើងត្រៀមខ្លួន រួចជាស្រេចក្នុងការសហការលើជំនួយបច្ចេកទេសដោយផ្ទាល់ពីអង្គការ UNOPS ឬក្រោមក្របខណ្ឌនៃ កិច្ចសហប្រតិបត្តិការត្បូង-ត្បូង កិច្ចសហប្រតិបត្តិការជើង-ត្បូង ឬសហការរៀបចំគម្រោងរួមគ្នារវាង អង្គការ UNOPS និងក្រសួង។ កិច្ចសហការនេះនឹងគាំទ្រដល់ ការអនុវត្តគោលនយោបាយអាទិភាពចំនួន ១៥ របស់ក្រសួង ដែលរួមមានការអភិវឌ្ឍន៍ទីក្រុងប្រកបដោយនិរន្តរភាព លំនៅដ្ឋាន ដែលមានតម្លៃសមរម្យ និងទីក្រុងឆ្លាតវៃ។”
កិច្ចសហការរបស់ ការិយាល័យអង្គការសហប្រជាជាតិសម្រាប់សេវាកម្មគម្រោង (UNOPS) ជាមួយនឹងក្រសួងទាំងនេះគូស បញ្ជាក់អំពី ការប្ដេជ្ញាចិត្តរួមក្នុងការដោះស្រាយបញ្ហាប្រឈមនៃវិស័យនគរូបនីយកម្ម ការប្រែប្រួលអាកាសធាតុ និងកំណើនសេដ្ឋកិច្ច។ តាមរយៈការធ្វើការងាររួមគ្នា ភាពជាដៃគូទាំងនេះមានគោលបំណងផ្ដល់ភាពអង់អាច ជូនប្រទេសកម្ពុជាក្នុងការអនុវត្តគម្រោងប្រកបដោយបរិវត្តកម្ម ដែលស្របទៅនឹង SDGs ក្នុងការបង្កើតអោយបាន នូវអនាគតមួយប្រកបដោយចីរភាព និងបរិយាបន្ន សម្រាប់មនុស្សគ្រប់រូប។
ចប់
កំណត់សម្គាល់សម្រាប់អ្នកពិនិត្យអត្ថបទ៖
រូបថតនៃព្រឹត្តិការណ៍នេះមាននៅទីនេះ
- ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ (MISTI)
- ក្រសួងសាធារណការ និងដឹកជញ្ជូន (MPWT)
- ក្រសួងរៀបចំដែនដី នគរូបនីយកម្ម និងសំណង់ (MLMUPC)
អំពី UNOPS៖
បេសកកម្មរបស់ ការិយាល័យអង្គការសហប្រជាជាតិសម្រាប់សេវាកម្មគម្រោង (UNOPS) គឺដើម្បីជួយកសាងជីវិតរស់នៅ របស់ប្រជាជនអោយកាន់តែល្អប្រសើរ និងជួយជម្រុញប្រទេសនានាអោយសម្រេចបានការអភិវឌ្ឍប្រកបដោយសន្តិភាព និងចីរភាព។ យើងផ្ដល់ដំណោះស្រាយជាក់ស្ដែងដើម្បីជួយអង្គការសហប្រជាជាតិ រដ្ឋាភិបាល និងដៃគូនានា នៅក្នុងការគ្រប់គ្រងគម្រោង និងផ្ដល់ហេដ្ឋារចនាសម្ព័ន្ធ និងលទ្ធកម្មប្រកបដោយចីរភាពក្នុងលក្ខខណ្ឌមួយប្រកបដោយ ប្រសិទ្ធភាព។
អង្គភាពរបស់អង្គការសហប្រជាជាតិដែលចូលរួមក្នុងគំនិតផ្តួចផ្តើមនេះ
គោលដៅប្រកបដោយចីរភាពដែលគាំទ្រតាមរយៈគំនិតផ្តួចផ្តើមនេះ
