កម្ពុជាចូលរួមភាពជាដៃគូជាសាកលដើម្បីពង្រឹងការប្តេជ្ញាចិត្តឆ្ពោះទៅរកការផ្លាស់ប្តូរសេដ្ឋកិច្ចបៃតងប្រកបដោយបរិយាប័ន្ន

គម្រោងភាពជាដៃគូនេះ ទទួលបានការគាំទ្រពីសហភាពអឺរ៉ុប (EU) ស្វីស អាល្លឺម៉ង់ ស៊ុយអែត ហ្វាំងឡង់ ន័រវេស និងកូរ៉េ និងមានរយៈពេលប្រាំឆ្នាំ ដែលរួមបញ្ចូលដំណាក់កាលចាប់ផ្តើម ១ឆ្នាំ ដែលនឹងបញ្ចប់នៅពាក់កណ្តាលឆ្នាំ ២០២៣។ PAGE បានសហការជាមួយវិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា ​(CDRI)​ ក្នុង​ការសិក្សា​លើ​វិសាល​ភាពគម្រោង (scoping study) ​ដើម្បីធានាថាការគាំទ្ររបស់ខ្លួននៅក្នុងប្រទេសកម្ពុជា​មានភាពស្រប​គ្នា​យ៉ាង​ពេញ​លេញជាមួយនឹងយុទ្ធសាស្រ្ត និងកម្មវិធីដែលមានស្រាប់។ ការសិក្សានេះគឺដើម្បី​កំណត់ពីឱកាស និងជម្រើស​សម្រាប់​​កំណែ​ទម្រង់​គោល​នយោបាយ​ម៉ាក្រូសេដ្ឋកិច្ច និងតាមវិស័យ រួមទាំងវិស័យ​ដែលសក្តានុពល​ខ្ពស់ដូចជា វិស័យកាត់ដេរ ទេសចរណ៍ កសិកម្ម និងហិរញ្ញវត្ថុ ដែលអាចធ្វើឲ្យមានការផ្លាស់ប្តូរ​សេដ្ឋកិច្ចបៃតង។

ជាតំណាងឯកឧត្ដមរដ្ឋមន្ត្រីក្រសួងបរិស្ថាន និងជាប្រធានក្រុមប្រឹក្សាជាតិអភិវឌ្ឍន៍ដោយចីរភាព ឯកឧត្ដមបណ្ឌិត​ជួប ប៉ារីស៍ អនុរដ្ឋលេខាធិការក្រសួងបរិស្ថាន​ បានគូសបញ្ជាក់ថា កម្ពុជាមានការប្តេជ្ញាចិត្តខ្ពស់ក្នុងការផ្លាស់ប្តូរ​ការអភិវឌ្ឍសេដ្ឋកិច្ចរបស់ខ្លួន គោលការណ៍សេដ្ឋកិច្ចបៃតង ដែលជាមធ្យោបាយមួយ ក្នុងការលើកកម្ពស់ការ​អភិវឌ្ឍ​ប្រកប​​ដោយចីរភាព និងតុល្យភាពសេដ្ឋកិច្ច សង្គម និងបរិស្ថាន នៅក្នុងព្រះរាជាណាចក្រកម្ពុជា។ ជាមួយ​នឹង​​ការប្តេជ្ញាចិត្តដ៏មុតមាំរបស់ខ្លួន កម្ពុជាបានដាក់ចេញគោលនយោបាយជាតិស្តីពី ការអភិវឌ្ឍបៃតង និង​ផែន​ការយុទ្ធសាស្រ្តជាតិស្តីពី ការអភិវឌ្ឍបៃតង ឆ្នាំ២០១៣-២០៣០ ជាពិសេសក្រមបរិស្ថាន និងធនធានធម្មជាតិ ហើយបានដាក់បញ្ជូនយុទ្ធសាស្ត្រអភិវឌ្ឍន៍រយៈពេលវែងប្រកបដោយ អព្យាក្រឹតកាបូន នៅ​កម្ពុជា(LTS4CN) ទៅ​កាន់​អនុសញ្ញាក្របខ័ណ្ឌអង្គការសហប្រជាជាតិស្តីពី ការប្រែប្រួលអាកាសធាតុ (UNFCCC) ។ អាស្រ័យ​​ហេតុ​នេះ ការចូលរួមភាព​ជាដៃគូជាសាកលនេះ នឹងជំរុញកិច្ចខិតខំប្រឹងប្រែងរបស់​ប្រទេសកម្ពុជា ក្នុងការកៀរគរ​ការ​គាំទ្រ​​បន្ថែម​ទៀតលើផ្នែកចំណេះដឹង និងហិរញ្ញវត្ថុទំនើប ដើម្បីពន្លឿន​បរិវត្តកម្មសេដ្ឋកិច្ចបៃតង​ប្រកបដោយ​បរិយាប័ន្ន។

លោក Asad Naqvi ប្រធានលេខាធិការដ្ឋាន PAGE បាននិយាយលម្អិតអំពីភាពខ្លាំងនៃកម្មវិធី PAGE ដែលនាំមកនូវចំណេះជំនាញរួមមានផ្នែកកំណើនសេដ្ឋកិច្ច ការងារ ការប្រកួតប្រជែងឧស្សាហកម្ម ការធ្វើ​ផែនការ​អភិវឌ្ឍន៍ជាតិ និងហិរញ្ញវត្ថុ និងការកសាងសមត្ថភាព។ ទាំងនេះគឺជាធាតុផ្សំសំខាន់ៗដែលត្រូវការ​សម្រាប់ការ​ផ្លាស់ប្តូរសេដ្ឋកិច្ច និងហិរញ្ញវត្ថុទាំងមូល។ លោក Asad បាន​បន្តថា  "ការផ្លាស់ប្តូរសេដ្ឋកិច្ចមិនមែនជាការងារ​ងាយ​ស្រួលទេដែលអាចសម្រេចបានដោយស្ថាប័នតែមួយ"។ លោកបានបន្តទៀតថា “យើងមានមោទនភាព​ចំពោះ​កម្មវិធីរបស់ប្រទេសកម្ពុជា ព្រោះវាបានកៀរគរក្រសួងពាក់ព័ន្ធ វិស័យឯកជន សង្គមស៊ីវិល ស្ថាប័នអប់រំ និងស្ថាប័នស្រាវជ្រាវជាច្រើន ដែលជាតួអង្គសំខាន់សម្រាប់ការផ្លាស់ប្តូរ”។

ថ្លែងក្នុងនាមទីភ្នាក់ងារទាំង៥របស់អង្គការសហប្រជាជាតិដែលគាំទ្រការអនុវត្ត PAGE កម្ពុជា លោក សុខ ណារិន តំណាងប្រចាំប្រទេសរបស់អង្គការ UNIDO បានរំលឹកឡើងវិញនូវការប្តេជ្ញាចិត្តរួម​របស់អង្គការ​សហប្រជាជាតិ​​ក្នុងការធ្វើការយ៉ាងជិតស្និទ្ធជាមួយក្រសួងពាក់ព័ន្ធនានា ដើម្បីធានាថា PAGE កម្ពុជា នឹងចូលរួម​ចំណែក​ក្នុងការ​លើកកម្ពស់កំណើនសេដ្ឋកិច្ចបៃតង ប្រកបដោយបរិយាប័ន្ននៅកម្ពុជា។ ការអនុវត្តកម្មវិធី PAGE ដើរស្របគ្នា​យ៉ាងពេញលេញ ហើយក៏ចូលរួមចំណែកដល់ការសម្រេចបាននូវគោលបំណងរួម នៃក្របខណ្ឌ​កិច្ចសហប្រតិបត្តិ​ការ​អភិវឌ្ឍន៍ប្រកបដោយចីរភាព របស់អង្គការសហប្រជាជាតិ (UNSDCF) ២០២៤-២០២៨។

កម្មវិធីនេះមានអ្នកចូលរួមសរុបចំនួន ១០០នាក់ មកពីក្រសួង-ស្ថាប័នពាក់ព័ន្ធ ក៏ដូចជាវិស័យឯកជន សង្គមស៊ីវិល ស្ថាប័នអប់រំ ស្ថាប័នស្រាវជ្រាវជាតិ និងដៃគូអភិវឌ្ឍន៍។ កម្មវិធីនេះបានបញ្ចប់នៅម៉ោង១៧:០០ល្ងាច។

ចំណាំ÷

ភាពជាដៃគូសម្រាប់សកម្មភាពសេដ្ឋកិច្ចបៃតង (PAGE) គឺជាភាពជាដៃគូសកលដែលផ្តួចផ្តើមដោយទីភ្នាក់ងារ​របស់អង្គការសហប្រជាជាតិ ចំនួន៥រួមមាន÷ អង្គការ​UNEP អង្គការILO អង្គការUNDP អង្គការUNIDO និងអង្គការ UNITAR សម្រាប់ជាការឆ្លើយតបទៅនឹងតម្រូវការដែលកំពុងកើនឡើង នៃសកម្មភាពសម្របសម្រួល ដើម្បីដោះស្រាយ​បញ្ហា​ដែលប្រឈមនឹងការអភិវឌ្ឍប្រកបដោយចីរភាព និងបញ្ហាដែលធ្វើឲ្យមានការប្រែប្រួល​អាកាសធាតុ​ដោយយ៉ោងទៅតាមសន្និសីទស្តីពី​ ការអភិវឌ្ឍន៍ប្រកបដោយចីរភាពរបស់អង្គការសហប្រជាជាតិ (Rio+20) នៅទីក្រុង Rio de Janeiro ប្រទេសប្រេស៊ីល ដែលបានធ្វើឡើងនាឆ្នាំ២០១២។ PAGE ត្រូវបានគាំទ្រដោយការរួមចំណែកដ៏សប្បុរសរបស់ដៃគូអនុវត្តរបស់ខ្លួន។ ការគាំទ្រ ហិរញ្ញប្បទាន និងការរួមចំណែក ទាំងអស់គឺមានសារៈសំខាន់ក្នុងការធ្វើឱ្យប្រទេសនានា មានឱកាសអភិវឌ្ឍន៍សេដ្ឋកិច្ចរបស់ពួកគេ ឲ្យក្លាយជាកត្តា ជំរុញនៃនិរន្តរភាព។ ដៃគូគាំទ្ររបស់ PAGE រួមមានដូចជាសហភាពអឺរ៉ុប ស្វីស អាល្លឺម៉ង់ ស៊ុយអែត ហ្វាំងឡង់ ន័រវែស និងកូរ៉េ។ ស្វែងរកព័ត៌មានលំអិតបន្ថែមអំពី PAGE នៅ÷ https://www.un-page.org/​​​ ។

The PAGE project in Cambodia is coordinated by UNITAR. The coordinating Government institution is the Department of Green Economy.

PAGE Cambodia Focal Point:

Ms. Rachana Kong

National Project Coordinator

Email: rachana.kong@unitar.org

Phone: +855 12 644 649

UNITAR Focal Point:

Ms. Amrei Horstbrink

Senior Specialist,

Green Development and Climate Change Programme

Email: amrei.horstbrink@unitar.org