ដំណើររបស់គ្រូបង្រៀនស្ត្រីក្នុងការលើកកម្ពស់ការស្រាវជ្រាវ និងការអភិវឌ្ឍដែលទាក់ទងនឹងថាមពលកកើតឡើងវិញ

«មិនថានៅ​ក្នុង​ឧស្សាហកម្ម ឬនៅក្នុង​ការ​អប់រំ និង​ការ​ស្រាវជ្រាវនោះទេ ជា​ញឹក​ញាប់​ យើងបាន​ឮ​ថា វិទ្យាសាស្ត្រ និង​បច្ចេកវិទ្យា​គឺ​ជាវិស័យសម្រាប់​បុរស។ ខ្ញុំ​គិត​ថា​វា​ជា​ទស្សនៈមួយលំអៀង។ ខ្ញុំបានជម្នះផ្នត់គំនិតសង្គមនេះហើយបានសម្រេចគោលដៅរបស់ខ្ញុំ។ ខ្ញុំ​ចង់​លើក​ទឹក​ចិត្ត​ស្ត្រី​ផ្សេង​ទៀតឱ្យ​ជឿជាក់​លើ​ខ្លួន​ឯង ​តាមសម្រេច​ក្តី​សុបិន​របស់​ពួក​គេ និង​បំផុស​គំនិត​ដល់​ស្ត្រី​ផ្សេង​ទៀត តាម​រយៈ​ការ​បង្ហាញ​គំរូ​ស្ត្រី​បន្ថែម​ទៀត​នៅក្នុង​វិស័យ​នេះ»។

ពិសី គឺជាស្ត្រីមួយរូបក្នុងចំណោមស្ត្រីដ៏តិចតួចដែលមកពីតំបន់ជនបទភាគខាងត្បូង ដែលបានជម្នះឧបសគ្គនៃបទដ្ឋានសង្គម និងវប្បធម៌លើស្ត្រីនៅក្នុងផ្នែកវិទ្យាសាស្ត្រ ដើម្បីបន្តការសិក្សាអប់រំ និងអាជីពរបស់នាងផ្នែកវិទ្យាសាស្ត្រ និងបច្ចេកវិទ្យា ជាមួយនឹងអាហារូបករណ៍ពេញលេញសម្រាប់ការសិក្សាថ្នាក់បរិញ្ញាបត្រ និងថ្នាក់ក្រោយបរិញ្ញាបត្ររបស់នាង។ បន្ទាប់ពីបញ្ចប់ការសិក្សា នាងបានចូលរួម និងរួមចំណែកក្នុងការងារទាក់ទងនឹងវិទ្យាសាស្ត្រផ្សេងៗ រួមទាំងការអប់រំផងដែរ តាមរយៈការបង្រៀននិស្សិតថ្នាក់បរិញ្ញាបត្រលើមុខវិជ្ជាវិទ្យាសាស្ត្រ និងសកម្មភាពស្រាវជ្រាវពាក់ព័ន្ធ ការប្រែប្រួលអាកាសធាតុ និងការអភិវឌ្ឍប្រកបដោយចីរភាព។ បច្ចុប្បន្ន​នាង​ជា​មន្ត្រី​នៅ​នាយកដ្ឋាន​ស្រាវជ្រាវ​វិទ្យាសាស្ត្រ នៃក្រសួង​អប់រំ យុវជន និង​កីឡា។

ពិសីកាន់តែមានការចាប់អារម្មណ៍លើបច្ចេកវិទ្យាថាមពលកកើតឡើងវិញក្នុងអំឡុងឆ្នាំសិក្សារបស់គាត់ទាក់ទងនឹងការគ្រប់គ្រងកាកសំណល់តាមរយៈការប្រើប្រាស់ឡជីវឧស្ម័ន ហើយបន្តចូលរួមក្នុងការបណ្តុះបណ្តាល និងសិក្ខាសាលាផ្សេងៗ។

គាត់បានលើកឡើងថា «ខ្ញុំមានការចាប់អារម្មណ៍ជាខ្លាំងនៅពេលដែលខ្ញុំបានដឹងជាលើកដំបូងអំពីអត្ថប្រយោជន៍ដ៏មានសក្តានុពលខ្លាំងនៃជីវឧស្ម័នដែលបានប្រើប្រាស់ជាប្រភពនៃថាមពលកកើតឡើងវិញ ហើយបានរួមចំណែកដល់គ្រប់វិមាត្រនៃការអភិវឌ្ឍប្រកបដោយចីរភាព រួមទាំងការការពារបរិស្ថាន ការធ្វើឱ្យកម្រិតជីវភាពប្រសើរឡើង និងការបង្កើនប្រាក់ចំណេញសម្រាប់ម្ចាស់កសិដ្ឋាន និងការបង្កើតផលប្រយោជន៍ផ្នែកសេដ្ឋកិច្ចសង្គមសម្រាប់សង្គម»។

ចាប់តាំងពីពេលនោះមក គាត់បានបន្តចូលរួមយ៉ាងសកម្មជាមួយកម្មវិធីបណ្តុះបណ្តាលដែលគាំទ្រដោយអង្គការសហប្រជាជាតិស្តីពីបច្ចេកវិទ្យាជីវឧស្ម័នពាណិជ្ជកម្ម ហើយបានប្រើប្រាស់ចំណេះដឹងនោះយ៉ាងសកម្ម។ គាត់បានដឹកនាំដោយជោគជ័យនូវគម្រោងផ្សេងៗទាក់ទងនឹងបរិស្ថាន និងការអភិវឌ្ឍ រួមទាំងគម្រោងបង្ហាញឡជីវឧស្ម័នសម្រាប់កសិករ ការចូលរួមរបស់និស្សិត និងបណ្ឌិត្យសភាក្នុងការស្រាវជ្រាវទាក់ទងនឹងការប្រែប្រួលអាកាសធាតុ និងសិក្ខាសាលាចែករំលែកចំណេះដឹងស្តីពីការប្រែប្រួលអាកាសធាតុសម្រាប់និស្សិតសាកលវិទ្យាល័យ។ ហើយគាត់បានបន្តលើកកម្ពស់បច្ចេកវិទ្យាជីវឧស្ម័ន តាមរយៈការផ្សព្វផ្សាយព័ត៌មានដល់សិស្ស-និស្សិត និងសហគមន៍របស់គាត់ និងតាមរយៈការងារស្រាវជ្រាវ និងអភិវឌ្ឍន៍។

ពិសី តែងតែប្តេជ្ញា និងចាប់យកឱកាសដើម្បីសម្រេចគោលដៅរបស់ខ្លួន និងផ្តល់មកឱ្យសង្គមវិញ។ តាមផ្លូវនៃការធ្វើដំណើររបស់គាត់ មានបញ្ហាប្រឈម និងឧបសគ្គផ្សេងៗដែលរំខានគាត់មិនឱ្យសម្រេចតាមក្តីប្រាថ្នាចំពោះវិស័យដែលគាត់ចូលចិត្ត។ គាត់នៅតែឮគេសួរសំណួរថា «ហេតុអ្វីបានជាអ្នកចង់សិក្សា និងធ្វើការក្នុងវិស័យដែលទាក់ទងនឹងវិទ្យាសាស្ត្រ និងបច្ចេកវិទ្យា» «វិទ្យាសាស្រ្តមិនស័ក្តិសមសម្រាប់ស្ត្រីទេ» ជាដើម។ ទោះជាយ៉ាងណាក៏ដោយ ផ្នត់គំនិតទាំងនោះត្រូវបានជម្នះដោយការជឿជាក់លើខ្លួនឯង ដោយផ្តោតលើអ្វីដែលគាត់ចង់បាន ការព្យាយាមឱ្យអស់ពីសមត្ថភាព និងការបង្ហាញស្នាដៃការងារ និងលទ្ធផលរបស់គាត់។

ពិសី គឺជាស្រ្តីម្នាក់ក្នុងចំណោមស្ត្រីដ៏តិចតួចដែលធ្វើការក្នុងវិស័យអប់រំ និងស្រាវជ្រាវ និងអភិវឌ្ឍន៍ទាក់ទងនឹងវិទ្យាសាស្ត្រ និងបច្ចេកវិទ្យា។ គាត់តែងតែលើកទឹកចិត្ត និងប្រាថ្នាចង់ឃើញស្ត្រីកាន់តែច្រើនចូលរួមក្នុងពិភពវិទ្យាសាស្ត្រ និងដើរតួនាទីយ៉ាងសកម្មនៅក្នុងសង្គម និងការអភិវឌ្ឍប្រកបដោយចីរភាព។

«ខ្ញុំគិតថាបច្ចុប្បន្ននេះមានមនុស្ស និងស្ត្រីកាន់តែច្រើនចាប់អារម្មណ៍លើវិទ្យាសាស្ត្រ ដោយសារមានព័ត៌មានទូលំទូលាយ និងមធ្យោបាយកាន់តែងាយស្រួលក្នុងការប្រាស្រ័យទាក់ទងគ្នា មិនដូចកាលពីដប់ឆ្នាំមុនទេ ហើយស្ថានភាពដែលមិនអំណោយផលក៏មានភាពប្រសើរឡើងដែរ។»

«ខ្ញុំចង់ឱ្យស្ត្រីជឿជាក់លើខ្លួនឯង មានជំហររឹងមាំចំពោះអ្វីដែលគាត់ចង់បាន ដើរតួជាអ្នកដឹកនាំ និងធ្វើជាគំរូសម្រាប់ក្មេងស្រី និងស្ត្រីវ័យក្មេងដទៃទៀតនៅក្នុងសហគមន៍របស់ខ្លួន។ សង្គមត្រូវតែទទួលស្គាល់ និងមានឆន្ទៈក្នុងការលើកតម្កើងតួនាទីសំខាន់របស់ស្ត្រីនៅក្នុងការអប់រំ ជាពិសេសសម្រាប់កូនៗ និងគ្រួសាររបស់ពួកគេផ្ទាល់។ ហើយយើងនៅគ្រប់លំដាប់ថ្នាក់ទាំងអស់ ចាប់ពីមិត្តភក្តិរហូតដល់រដ្ឋាភិបាល និងអង្គការអភិវឌ្ឍន៍នានា នឹងបង្កើតឱ្យមានបរិយាកាសកាន់តែអំណោយផលសម្រាប់ស្ត្រីដើម្បីជំរុញការចាប់អារម្មណ៍របស់ពួកគេ និងឱ្យពួកគេសម្រេចតាមក្តីសុបិនរបស់ពួកគេក្នុងវិស័យវិទ្យាសាស្ត្រ និងបច្ចេកវិទ្យា ដូចជាតាមរយៈការផ្តល់អាហារូបករណ៍ ការផ្តល់មូលនិធិសម្រាប់ការស្រាវជ្រាវ ហើយសំខាន់ជាងនេះទៅទៀតគឺការគាំទ្រពីសង្គមដើម្បីជួយសម្រាលកិច្ចការផ្ទះរបស់ពួកគេ ដើម្បីឱ្យស្ត្រីអាចមានពេលសម្រាប់សិក្សា កសាងបណ្តាញ និងធ្វើការងារដូចបុរសដែរ»។

ពិសី បានចូលរួមក្នុងវគ្គបណ្តុះបណ្តាលអំពីជីវឧស្ម័នជាបន្តបន្ទាប់ ដែលរៀបចំដោយកម្មវិធីសហប្រជាជាតិ «ការកាត់បន្ថយការបញ្ចេញឧស្ម័នផ្ទះកញ្ចក់ តាមរយៈការលើកកម្ពស់រោងចក្រជីវឧស្ម័នពាណិជ្ជកម្ម»។ កម្មវិធីនេះមានគោលបំណងកសាងសមត្ថភាពថ្នាក់ជាតិលើបច្ចេកវិទ្យាជីវឧស្ម័នពាណិជ្ជកម្ម ដើម្បីជួយដល់អាជីវកម្មកសិពាណិជ្ជកម្មកម្ពុជា ក្នុងការបំពេញលក្ខខណ្ឌតម្រូវផ្នែកបរិស្ថានសម្រាប់ការគ្រប់គ្រងកាកសំណល់ និងការកាត់បន្ថយការបញ្ចេញឧស្ម័នផ្ទះកញ្ចក់ ខណៈពេលដែលប្រើប្រាស់ជីវថាមពលដែលផលិតបានសម្រាប់ផលិតកម្មនានា។