សប្តាហ៍គាំពារសង្គម ថ្ងៃទី១៥-១៧ ខែកុម្ភៈ ឆ្នាំ២០២២ | សន្និសីទកម្រិតខ្ពស់៖ ការគាំពារសង្គមពេញមួយវដ្តជីវិត

[ផ្ទៀងជាមួយការថ្លែងសុន្ទរកថា]

ឯកឧត្តមបណ្ឌិត អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាទីគោរព!

គណៈប្រតិភូនៃរាជរដ្ឋាភិបាលជាទីគោរព!

សហសេវិកកិត្តិយសនៃដៃគូអភិវឌ្ឍន៍ និងប្រព័ន្ធអង្គការសហប្រជាជាតិ ជាទីគោរព!

ឯកឧត្តម លោកជំទាវ អស់លោក លោកស្រី អ្នកនាង កញ្ញា ជាទីមេត្រី!

ជាកិត្តិយសណាស់ដែលបានចូលរួមជាមួយឯកឧត្តម លោកជំទាវ អស់លោក លោកស្រី អ្នកនាង កញ្ញា នៅព្រឹកនេះ ដើម្បីចាប់ផ្តើមបើកសប្តាហ៍គាំពារសង្គម ដែលជាផ្នែកមួយនៃការគាំទ្រមូលនិធិ SDG រួមរបស់អង្គការសហប្រជាជាតិ ដល់រាជរដ្ឋាភិបាលកម្ពុជា។ នេះគឺជាឱកាសដ៏សមស្របមួយដើម្បីឆ្លុះបញ្ចាំងរួមគ្នាអំពី សមិទ្ធផល និងវឌ្ឍនភាពដែលសម្រេចបានក្នុងរយៈពេលប៉ុន្មានឆ្នាំកន្លងមក ក៏ដូចជាបញ្ហាប្រឈម និងកាលានុវត្តភាពនាពេលខាងមុខ។

ជាបឋម តាងនាមឱ្យប្រព័ន្ធអង្គការសហប្រជាជាតិ ខ្ញុំសូមអបអរសាទរ និងកោតសរសើរដល់រាជរដ្ឋាភិបាលកម្ពុជាចំពោះវឌ្ឍនភាពដ៏គួរឱ្យកត់សម្គាល់ក្នុងការពង្រីកវិសាលភាពគ្របដណ្តប់លើការគាំពារសង្គមក្នុងរយៈពេលប៉ុន្មានឆ្នាំថ្មីៗនេះ។ ចាប់តាំងពីការដាក់ឱ្យប្រើប្រាស់នូវក្របខណ្ឌគោលនយោបាយជាតិគាំពារសង្គមក្នុងឆ្នាំ២០១៦ ប្រព័ន្ធជំនួយសង្គម និងប្រព័ន្ធសន្តិសុខសង្គមត្រូវបានពង្រីកយ៉ាងទូលំទូលាយ ដើម្បីធានាថាមិនមែនត្រឹមតែប្រជាជនកម្ពុជាដែលងាយរងគ្រោះបំផុតប៉ុណ្ណោះទេ អាចទទួលបានការគាំពារកាន់តែប្រសើរឡើង ប៉ុន្តែប្រជាជនកម្ពុជាកាន់តែច្រើនដែលប្រឈមនឹងការធ្លាក់ចូលទៅក្នុងភាពក្រីក្រក៏អាចទទួលបានការគាំពារដូចគ្នាដែរ។

អង្គការសហប្រជាជាតិបានចាត់ទុកថាវិបត្តិនៃជំងឺរាតត្បាតកូវីដ-១៩ គឺជាកាលានុវត្តភាពសម្រាប់ការផ្លាស់ប្តូរ។

យើងបានកត់សម្គាល់ឃើញថាការផ្លាស់ប្តូរបានប្រព្រឹត្តទៅនៅក្នុងល្បឿន និងវិសាលភាពមួយដែលពីមុនយើងមិននឹកស្មានថាអាចធ្វើទៅបាននៅក្នុងវិធានការគាំពារសង្គមដែលដាក់ចេញដោយរាជរដ្ឋាភិបាល ដើម្បីកាត់បន្ថយផលប៉ះពាល់ដ៏អាក្រក់នៃជំងឺរាតត្បាតកូវីដ-១៩ នោះទេ។ កម្មវិធីផ្តល់សាច់ប្រាក់សម្រាប់ជនក្រីក្រ និងជនងាយរងគ្រោះបានផ្តល់អត្ថប្រយោជន៍ដល់ប្រជាជនប្រមាណ ៧០០ ០០០ គ្រួសារ ពោលគឺប្រជាជនជិត ២,៨ លាននាក់។ ប្រព័ន្ធបេឡាជាតិរបបសន្តិសុខសង្គមក៏ត្រូវបានដាក់ឱ្យអនុវត្តយ៉ាងឆាប់រហ័សផងដែរ ដើម្បីអនុវត្តគម្រោងឧបត្ថម្ភធនដល់ប្រាក់ឈ្នួលសម្រាប់កម្មករនិយោជិតដែលត្រូវបានព្យួរការងារក្នុងវិស័យកាត់ដេរ និងទេសចរណ៍។ វិធានការទាំងនេះបានបង្ហាញពីសមត្ថភាពកាន់តែខ្ពស់របស់រាជរដ្ឋាភិបាលកម្ពុជាក្នុងនាមជាអ្នកមានករណីយកិច្ចក្នុងការជួយសង្គ្រោះជីវិត និងជីវភាពរស់នៅរបស់ប្រជាពលរដ្ឋ ហើយសំខាន់បំផុតនោះ គឺការធានានូវសិទ្ធិទទួលបានការគាំពារសង្គមសម្រាប់ប្រជាជនកម្ពុជាគ្រប់រូប។

ក្រៅពីការការពារប្រជាជនមិនឱ្យធ្លាក់ចូលទៅក្នុងភាពក្រីក្រ វិធានការគាំពារសង្គមក៏បានបញ្ចៀសកុំឱ្យមានការធ្លាក់ចុះសេដ្ឋកិច្ចកាន់តែធ្ងន់ធ្ងរផងដែរ។ ដោយសហការជាមួយក្រសួងសេដ្ឋកិច្ច និងហិរញ្ញវត្ថុ (MEF) គំរូសេដ្ឋកិច្ចរបស់អង្គការសហប្រជាជាតិ បានបង្ហាញថា កម្មវិធីគាំពារសង្គមបានជួយកាត់បន្ថយភាពក្រីក្របានប្រហែល ៣,៤ ភាគរយ និងជួយដល់កំណើនផលិតផលក្នុងស្រុកសរុប (ផ.ស.ស.) ជិត ១ ភាគរយ។ វិធានការគាំពារសង្គមក៏បានធ្វើឱ្យប្រសើរឡើងនូវការវេញគ្នាជាធ្លុងមួយនៅក្នុងសង្គម និងការកសាងទំនុកចិត្តនៅក្នុងស្ថាប័នសាធារណៈផងដែរ ដែលវាពិតជាមានសារៈសំខាន់ក្នុងការបង្កើតឱ្យមានខឿនសេដ្ឋកិច្ច និងសង្គមមួយប្រកបដោយបរិយាបន្ន ភាពធន់ និងវិបុលភាព។ កិច្ចគាំពារសង្គមជួយពន្លឿនវឌ្ឍនភាពឆ្ពោះទៅសម្រេចបាននូវគោលដៅអភិវឌ្ឍន៍ប្រកបដោយចីរភាពកម្ពុជា (CSDGs)។

ទោះបីជាទទួលបានជោគជ័យក៏ដោយ ការងាររបស់យើងលើការគាំពារសង្គមគឺទើបតែចាប់ផ្តើមទេ។ ខណៈពេលដែលជំងឺរាតត្បាតនៅតែបន្តកើនឡើងនៅជុំវិញពិភពលោក វាបានបង្ហាញថាបញ្ហាវិសមភាពដែលបានចាក់ឫសយ៉ាងជ្រៅអាចបំផ្លិចបំផ្លាញសូម្បីតែសេដ្ឋកិច្ចនៃបណ្តាប្រទេសជឿនលឿនខ្លាំង ជាពិសេសសម្រាប់អ្នកដែលមិនមានលទ្ធភាពទទួលបានសេវាថែទាំសុខភាព និងសំណាញ់សុវត្ថិភាពសង្គម។ ក្នុង​នាម​ជា​សង្គម​មួយ យើង​អាចខ្លាំងទៅបានទាល់តែយើងរួមគ្នាជាធ្លុងមួយ។

ហេតុនេះហើយធ្វើឱ្យខ្ញុំចោទជាសំណួរមួយចំនួនដូចតទៅ៖ តើយើងរក្សាកិច្ចខិតខំប្រឹងប្រែងក្នុងការផ្តល់ការគាំពារសង្គមបានយ៉ាងដូចម្តេច ដើម្បីមានវិសាលភាពគ្របដណ្តប់លើប្រជាជននៅគ្រប់ផ្នែក ជាពិសេសក្រុមប្រជាជនងាយរងគ្រោះដែលប្រឈមនឹងការដែលត្រូវគេបោះបង់ ឬទុកចោល។

តើភាគីពាក់ព័ន្ធផ្សេងៗគ្នាដូចជា វិស័យឯកជន ដៃគូអភិវឌ្ឍន៍ និងសង្គមស៊ីវិល អាចសហការគ្នាដើម្បីគាំទ្រដល់កិច្ចខិតខំប្រឹងប្រែងរបស់រាជរដ្ឋាភិបាលដើម្បីទ្រទ្រង់ដល់ការពង្រីកវិសាលភាពគាំពារសង្គមដែលជាផ្នែកមួយដ៏សំខាន់នៅក្នុងការកសាងអ្វីៗឱ្យកាន់តែប្រសើរឡើងវិញពីជំងឺរាតត្បាតនេះបានយ៉ាងដូចម្តេច?

តើការគាំពារសង្គមអាចត្រូវបានបញ្ចូលនៅក្នុងអាទិភាពអភិវឌ្ឍន៍សេដ្ឋកិច្ច និងសង្គមជាតិ បញ្ចូលគោលនយោបាយតាមវិស័យ និងសម្របសម្រួលជាមួយក្រសួងជំនាញពាក់ព័ន្ធក្នុងរដ្ឋាភិបាលទាំងមូល និងអភិក្រមប្រព័ន្ធទាំងមូលបានយ៉ាងដូចម្តេច? តើការគាំពារសង្គមអាចបង្កើនប្រសិទ្ធភាពនៃការបែងចែកធនធានបានយ៉ាងដូចម្តេច? អង្គការសហប្រជាជាតិទទួលស្គាល់ពីរបៀបដែលការគាំពារសង្គមត្រូវបានបញ្ចូលជាអាទិភាពមួយក្នុងចំណោមអាទិភាពទាំងឡាយនៃ “ក្របខណ្ឌយុទ្ធសាស្រ្ត និងកម្មវិធីសម្រាប់ការស្តារសេដ្ឋកិច្ចឆ្នាំ២០២១-២០២៣”។ ការគាំពារសង្គមកសាងឱ្យមានភាពធន់ ហើយនឹងត្រូវក្លាយជាផ្នែកមួយនៃកិច្ចខិតខំប្រឹងប្រែងដែលទូលំទូលាយជាងមុនក្នុងការផ្តល់ហិរញ្ញប្បទានដល់អាទិភាពអភិវឌ្ឍន៍នានា។

ស្របពេលដែលប្រព័ន្ធអភិវឌ្ឍន៍របស់អង្គការសហប្រជាជាតិមានការប្តេជ្ញាចិត្តយ៉ាងមុតមាំ និងត្រៀមខ្លួនរួចជាស្រេចដើម្បីបន្តការគាំទ្ររបស់យើងសំដៅទ្រទ្រង់ដល់ការពង្រីកវិសាលភាពនៃការគ្របដណ្តប់របស់ប្រព័ន្ធគាំពារសង្គមនោះ យើងដឹងយ៉ាងច្បាស់អំពីបញ្ហាប្រឈមនៃការផ្តល់ហិរញ្ញប្បទាន និងឧបសគ្គផ្នែកសារពើពន្ធ។

ក្រោមកិច្ចសហការជាមួយរាជរដ្ឋាភិបាលកម្ពុជា ប្រព័ន្ធអង្គការសហប្រជាជាតិកំពុងស្វែងរកជម្រើសសម្រាប់ពង្រីកទំហំសារពើពន្ធ និងកៀរគរហិរញ្ញប្បទានបន្ថែមសម្រាប់ការអភិវឌ្ឍ។ យើងនឹងត្រូវរួមគ្នាគិតដើម្បីច្នៃប្រឌិត និងពង្រីកជម្រើសផ្សេងៗ។ ជម្រើសទាំងនេះមួយចំនួនរួមមាន៖

ទី​មួយ កំណែទម្រង់​គោលនយោបាយ​សារពើពន្ធ​ឱ្យ​កាន់តែ​រីកចម្រើន រួមទាំង​ការបង្កើន​ពន្ធ​លើ​ថ្នាំជក់ គ្រឿង​ស្រវឹង និង​ល្បែងស៊ីសង​។

ទីពីរ ការអភិវឌ្ឍមាគ៌ាសុវត្ថិភាពសម្រាប់ការផ្តល់ហិរញ្ញប្បទានបំណុល និង

ទីបី ការកៀរគរហិរញ្ញប្បទានបៃតង រួមទាំង រេដ+ និងមូលនិធិអាកាសធាតុសាកល ដែលអាចបង្កើនទំហំសារពើពន្ធសម្រាប់ការគាំពារសង្គម ក្នុងចំណោមមូលនិធិផ្សេងៗទៀត។

ជាពិសេសសម្រាប់ការគាំពារសង្គម ការជំរុញឱ្យមានដំណើរការជាផ្លូវការនៃសកម្មភាពសេដ្ឋកិច្ច និងការងារពិតជាមានភាពចាំបាច់ណាស់ក្នុងការពង្រីកមូលដ្ឋានសម្រាប់ចំណូលរបស់រដ្ឋាភិបាល និងពង្រឹងកិច្ចសន្យាសង្គមរវាងរដ្ឋ និងប្រជាជនផងដែរ។

ការងាររបស់អង្គការសហប្រជាជាតិជាមួយក្រសួងសេដ្ឋកិច្ច និងហិរញ្ញវត្ថុលើ “ក្របខណ្ឌហិរញ្ញប្បទានជាតិរួមបញ្ចូលគ្នា” រួមមានការបង្កើតយុទ្ធសាស្រ្តហិរញ្ញប្បទានសម្រាប់ SDGs ការគាំទ្រផែនការរបស់រដ្ឋាភិបាលក្នុងការចេញផ្សាយសញ្ញាបណ្ណជាតិជាប្រាក់រៀល និងការភ្ជាប់ថវិកាជាតិជាមួយ CSDGs (ឬការតាមដានការប្រើប្រាស់ថវិកា) ក្នុងចំណោមការងារជាច្រើនផ្សេងទៀត។

កាលពីឆ្នាំមុន ជាផ្នែកមួយនៃគំនិតផ្តួចផ្តើមរបស់អង្គការសហប្រជាជាតិស្តីពី “ការផ្តល់ហិរញ្ញប្បទានសម្រាប់ការអភិវឌ្ឍក្នុងយុគសម័យនៃកូវីដ-១៩ និងលើសពីនេះ” អគ្គលេខាធិការនៃអង្គការសហប្រជាជាតិបានប្រកាសបង្កើត “កម្មវិធីបង្កើនល្បឿនសាកល” ដើម្បីជួយធានាការផ្តល់ហិរញ្ញប្បទានសាកលក្នុងគោលបំណងបង្កើតការងារឱ្យបាន ៤០០ លានកន្លែង និងពង្រីកការគាំពារសង្គមដល់មនុស្ស ៤ ពាន់លាននាក់នៅទូទាំងពិភពលោក ដែលបច្ចុប្បន្នមិនមានការធានារ៉ាប់រងទេ។ នៅដំណាក់កាលដំបូង កម្មវិធីបង្កើនល្បឿននេះនឹងត្រូវបានអនុវត្តនៅក្នុងបណ្តាប្រទេសដែលមានចំណូលទាប និងមធ្យមមួយចំនួន (ដែលហៅថា “អ្នកស្វែងរកផ្លូវ”) ដែលមានសក្តានុពលយ៉ាងច្រើនក្នុងការពង្រីកការវិនិយោគលើការគាំពារសង្គម និងការងារសមរម្យ។ ដោយមានការប្តេជ្ញាចិត្តខ្ពស់ចំពោះការពង្រីកការគាំពារសង្គម ប្រទេសកម្ពុជានឹងក្លាយជាបេក្ខភាពដ៏ឆ្នើមមួយក្នុងចំណោម “បណ្តាប្រទេសជាអ្នកស្វែងរកផ្លូវ”។

ខ្ញុំសូមធ្វើសេចក្តីសន្និដ្ឋានដោយបង្កប់នូវសារមួយដែលមានខ្លឹមសារថា ការដឹកនាំផ្នែកនយោបាយ និងការប្តេជ្ញាចិត្តចំពោះនវានុវត្តន៍ក្នុងការអភិវឌ្ឍនឹងក្លាយជាគន្លឹះក្នុងការដោះសោការផ្តល់ហិរញ្ញប្បទានប្រកបដោយចីរភាពសម្រាប់ការគាំពារសង្គម ដែលជាមូលដ្ឋានគ្រឹះសម្រាប់ធានានូវភាពធន់ និងការកសាងភាពល្អប្រសើរ និងធានាថាគ្មាននរណាម្នាក់ត្រូ​វបានគេទុកចោលមិនអើពើនៅក្នុងពេលរើបឡើងវិញពីជំងឺរាតត្បាតនេះឡើយ។ អង្គការសហប្រជាជាតិនឹងផ្តល់ការគាំទ្រដល់ឯកឧត្តម លោកជំទាវ អស់លោក លោកស្រី អ្នកនាង កញ្ញា នៅក្នុងកិច្ចខិតខំប្រឹងប្រែងនេះ។

រួមគ្នា យើងកាន់តែរឹងមាំ!

សូមអរគុណ!