តើការផ្តល់ជាសាច់ប្រាក់អាចជួយគ្រួសារមួយឱ្យជម្នះគ្រោះតក់ស្លុតជាច្រើនបានយ៉ាងដូចម្តេចខ្លះ?

សុផល និង​ប្រពន្ធ​របស់គាត់ឈ្មោះ សោភ័ណ្ឌ បើករបរតូច​មួយលក់នំបញ្ចុកនៅ​ផ្ទះ​របស់ពួកគេដែល​ស្ថិតនៅ​ជាប់​មាត់​ទន្លេ ហើយដោយសារតែគ្រោះ​ទឹក​ជំនន់ ពួកគេរងការប៉ះពាល់យ៉ាងខ្លាំង។ «យើង​ធ្វើ​នំបញ្ចុកលក់មិនបាន ហើយចង់​ធ្វើ​ដំណើរ​ទៅ​ណា​មក​ណា​ដើម្បី​រក​ប្រាក់​ចំណូល​ក៏មិនបានដែរ។ យើងមានការព្រួយបារម្ភ​ខ្លាំង​ណាស់ យើង​មិន​ដឹង​ត្រូវ​ធ្វើ​យ៉ាងណាទេដើម្បី​ចិញ្ចឹម​កូន​តូចៗ​របស់​យើង ហើយខ្លាចក្រែងពួកគេ​ឈឺ។»

សុផល ជាឪពុកម្នាក់ដែលមានកូន ៤ នាក់ រស់នៅក្នុងខេត្តពោធិ៍សាត់ រំលឹកពីបទពិសោធន៍របស់គាត់ដែលបានឆ្លងកាត់នៅក្នុងពេលមានគ្រោះទឹកជំនន់ភ្លាមៗ ដែលបានប៉ះពាល់ដល់ប្រជាជនកម្ពុជាជិត ៨០០ ០០០ នាក់ក្នុងខែតុលា ឆ្នាំ២០២០។ ដូចគ្នានឹងជំងឺរាតត្បាតដែលកំពុងកើតមាននេះដែរ គ្រោះទឹកជំនន់ទាំងនេះបានប៉ះពាល់ដល់ប្រជាជនជាច្រើន ជាពិសេសប្រជាជនក្រីក្រ ហើយសម្រាប់គ្រួសារទាំងឡាយដូចជាគ្រួសាររបស់សុផលដែរ គ្រោះតក់ស្លុតទាំងពីរនេះរឹតតែបន្ថែមបន្ទុកទៅលើការលំបាកក្នុងបញ្ហាជីវភាព និងសុខភាពគ្រួសាររបស់គាត់។

ចំណូលរបស់​គ្រួសារ​សុផល​រងការ​ប៉ះពាល់​យ៉ាង​ខ្លាំង។ គ្រួសារនេះជាធម្មតារកប្រាក់ចំណូលបានភាគច្រើនដោយសារការលក់នំបញ្ចុកសម្រាប់ពិធីមង្គលការ និងពិធីបុណ្យធំៗផ្សេងទៀតនៅក្នុងមូលដ្ឋាន ដែលធ្វើឱ្យពួកគេងាយរងគ្រោះយ៉ាងខ្លាំង។ សុផលបានរំលឹកថា «ដោយសារជំងឺកូវីដ-១៩ ព្រឹត្តិការណ៍ធំៗដូចជា ពិធីមង្គលការ និងពិធីធំៗ មិនត្រូវបានអនុញ្ញាតឱ្យធ្វើនោះទេ។ ចំនួននៃការកុម្ម៉ង់បានធ្លាក់ចុះយ៉ាងឆាប់រហ័ស» និងបានប៉ាន់ប្រមាណថាពួកគេបានបាត់បង់ប្រាក់ចំណូលអស់ពីរភាគបី ហើយនៅពេលដែលភ្លៀងធ្លាក់ខ្លាំង កម្រិតទឹកទន្លេបានឡើងដល់ត្រឹមជង្គង់លិចដល់ផ្ទះរបស់គាត់អស់ពេញមួយខែ ធ្វើឱ្យពួកគាត់មិនអាចធ្វើនំបញ្ចុក​លក់បាន ឬ​រក​ចំណូល​បានទាល់តែសោះ។

ប្តីប្រពន្ធមួយគូនេះត្រូវបង្ខំចិត្តបិទអាជីវកម្មរបស់ពួកគេ ហើយប្រឈមនឹងការលំបាកយ៉ាងខ្លាំងក្នុងការរកម្ហូបអាហារដើម្បីចិញ្ចឹមកូនទាំងបួនជារៀងរាល់ថ្ងៃ។ សុផល​ក៏បានងាក​ទៅ​នេសាទ​វិញ ប៉ុន្តែ​កម្រចាប់ត្រី​បានគ្រប់​គ្រាន់ដើម្បីផ្គត់ផ្គង់គ្រួសារណាស់។ ទឹកជំនន់ដែលបានលិចចូលទៅដល់ក្នុងផ្ទះបានធ្វើឱ្យប្តីប្រពន្ធទាំងពីរនេះចេះតែភ័យខ្លាចថាកូនរបស់ពួកគេអាចនឹងកើតជំងឺគ្រុនចាញ់ឬជំងឺឆ្លងតាមទឹកផ្សេងទៀត ហើយបើដូច្នោះមែន ពួកគេដឹងថាពួកគេរឹតតែលំបាកក្នុងការចំណាយលើថ្លៃធ្វើដំណើរ ទៅព្យាបាលជំងឺ។

កម្មវិធីនេះគឺសម្រាប់ជួយទៅដល់គ្រួសារងាយរងគ្រោះដូចជាគ្រួសាររបស់ សុផល ដែលរាជរដ្ឋាភិបាលកម្ពុជាបានផ្តល់ការឧបត្ថម្ភជាច្រើនដល់ជនងាយរងគ្រោះដែលរងផលប៉ះពាល់ដោយសារជំងឺរាតត្បាតនេះ តាមរយៈការឧបត្ថម្ភសាច់ប្រាក់ចំពោះការប៉ះពាល់ពីជំងឺកូវីដ-១៩ ចាប់តាំងពីដើមឆ្នាំ២០២០ មក។ បន្ទាប់ពីកើតមានគ្រោះទឹកជំនន់ កម្មវិធីស្បៀងអាហារពិភពលោក (WFP) ក៏បានចាប់ផ្តើមឧបត្ថម្ភសាច់ប្រាក់បន្ថែមផងដែរ ទៅដល់ ៤០ ០០០ គ្រួសារដែលបានរងផលប៉ះពាល់ដោយសារជំងឺរាតត្បាត និងគ្រោះទឹកជំនន់ ដោយដឹងថាពួកគេបានជួបបញ្ហាអសន្តិសុខផ្នែកសេដ្ឋកិច្ច និងអសន្តិសុខស្បៀង។ កម្មវិធីនេះទទួលបានការគាំទ្រពីអង្គការ Deutsche Gesellschaft fuer Internationale Zusammenarbeit (GIZ) តាងនាមឱ្យក្រសួងសហប្រតិបត្តិការ និងអភិវឌ្ឍន៍សេដ្ឋកិច្ច (BMZ) នៃសហព័ន្ធអាល្លឺម៉ង់ ដែលបានប្តេជ្ញាផ្តល់ថវិកាចំនួន ៦ លានដុល្លារអាមេរិក។ គោលបំណងនៃកម្មវិធីនេះគឺដើម្បីជួយប៉ះប៉ូវការខាតបង់ ជួយឱ្យគ្រួសារដែលរងការប៉ះពាល់ មានអាហារូបត្ថម្ភអប្បបរមាតាមតម្រូវការ និងកាត់បន្ថយផលប៉ះពាល់នៃគ្រោះមហន្តរាយទាំងឡាយ ដែលបានបង្កការលំបាកសម្រាប់មនុស្សរាប់លាននាក់ដែលរស់នៅក្នុងតំបន់ដែលងាយរងគ្រោះដោយទឹកជំនន់នៃប្រទេសកម្ពុជា។

សុផល បានរំលឹកថា «ដំបូង​ខ្ញុំ​បាន​ឮ​អំពី​កម្មវិធី​ផ្តល់សាច់ប្រាក់​តាម​រយៈ​មេ​ភូមិ​របស់​យើង។ ខ្ញុំ​មាន​អារម្មណ៍​សប្បាយ​ចិត្ត​ព្រោះវាបាន​មក​ដល់ចំពេលដែល​ខ្ញុំ​ត្រូវ​ការវាខ្លាំង​បំផុត”។​ សុផល បានបន្តថា “បើ​គ្មានប្រាក់​នេះទេ ខ្ញុំ​ប្រាកដជាត្រូវ​ជំពាក់​បំណុលសាច់ញាតិ​ និងអ្នកជិត​ខាង​របស់ខ្ញុំមិនខាន ដើម្បី​យកប្រាក់មកផ្គត់ផ្គង់​គ្រួសាររបស់ពួកយើង ព្រោះយើង​គ្មាន​ជម្រើស​ទេ»។

ប្តីប្រពន្ធមួយគូនេះ មិនត្រឹមតែយកប្រាក់នេះទៅទិញម្ហូបអាហារប៉ុណ្ណោះទេ ពួកគេថែមទាំងយកវាទៅបើកមុខរបរគ្រួសារឡើងវិញ និងធ្វើឱ្យវាមានភាពធន់ជាងមុនចំពោះបញ្ហានៅថ្ងៃអនាគត ដែល​រួម​បញ្ចូល​ទាំង​ការ​ជួសជុល​ម៉ូតូ​របស់​ពួក​គេ​ដែលរងការខូច​ខាតផងដែរ។ បើគ្មានម៉ូតូនោះទេ ពួកគេមិនអាចបើកមុខរបររបស់ពួកគេឡើងវិញបានទេ ព្រោះនៅពេលជួសជុលម៉ូតូរួច ពួកគាត់អាចលក់នំបញ្ចុក និងផ្គត់ផ្គង់ជីវភាពគ្រួសារឱ្យបានសមរម្យជាងមុន។

ពេលនេះ សុផល និង​សោភ័ណ្ឌ​មានក្តីសង្ឃឹមសម្រាប់ថ្ងៃអនាគតច្រើន​ជាង​ពេលមុន។ មុខរបររបស់ពួកគេបានដំណើរការឡើងវិញហើយ ហើយការកើនឡើងនៃចំនួនប្រជាជនដែលបានចាក់វ៉ាក់សាំងនៅក្នុងប្រទេសកម្ពុជា ធ្វើឱ្យពួកគេសង្ឃឹមថា ពិធីមង្គលការ និងព្រឹត្តិការណ៍ផ្សេងទៀតនឹងអាចធ្វើទៅបានជាធម្មតាឡើងវិញ ដែលនឹងធ្វើឱ្យគ្រួសាររបស់ពួកគេមានឱកាសរកប្រាក់ចំណូលឡើងវិញបាន។ “នៅថ្ងៃអនាគត ពួកយើងសង្ឃឹមថានឹងអាចមានផ្ទះមួយសមរម្យសម្រាប់កូនៗរបស់ពួកយើង”។