និមិត្តសញ្ញាគុណភាពផល ផលិតផលជលផលកម្ពុជា (CQS)

និមិត្តសញ្ញាគុណភាពផល ផលិតផលជលផលកម្ពុជា (CQS) គឺជាប្រព័ន្ធវិញ្ញាបនបត្របញ្ជាក់គុណភាពដ៏មានកិត្យានុភាព គ្រប់គ្រងដោយនាយកដ្ឋានបច្ចេកវិទ្យាកែច្នៃ និងគុណភាព (DFPTQ)​ នៃរដ្ឋបាលជលផល (FiA) ដែលត្រូវបានបង្កើតឡើងសម្រាប់ផលិតផលជលផល ដើម្បីបញ្ជាក់ទទួលស្គាល់ដល់សហគ្រាសណាដែលមានការប្តេជ្ញាខ្ពស់ក្នុងការផលិតនូវផលិតផលដែលមានគុណភាពខ្ពស់ និងប្រកបដោយសុវត្ថិភាព។ និមិត្តសញ្ញានេះត្រូវបានផ្តល់ជូនដល់សហគ្រាសណាដែលបានបំពេញតាមលក្ខខណ្ឌតម្រូវយ៉ាងម៉ត់ចត់ទៅលើ សុវត្ថិភាព គុណភាព ទំនួលខុសត្រូវផ្នែកបរិស្ថាន សមភាពយេនឌ័រ ការបង្ការពលកម្មកុមារ និងការបំពេញតាមតម្រូវការអតិថិជន។ CQS គឺជានិមិត្តសញ្ញានៃការជឿទុកចិត្ត និងភាពជឿជាក់ ហើយវាត្រូវកំពុងត្រូវបានប្រើប្រាស់ ដោយសហគ្រាសណាដែលប្រាថ្នាចង់ប្រកួតប្រជែងនៅក្នុងទីផ្សារ ខុសពីសហគ្រាសដទៃទៀត។ ជាមួយនឹងនិមិត្តសញ្ញាគុណភាព CQS អ្នកប្រើប្រាស់អាចជឿជាក់បានថាពួកគេបានជ្រើសរើសនូវផលិតផលដែលបានឆ្លងកាត់ការផ្ទៀងផ្ទាត់គុណភាពយ៉ាងដិតដល់។​